LEGAZPI CITY — Inako kan Albay Provincial Police Office (PPO) na nagin maluya sinda sa pagpautob kan batas trapiko kun kaya kadakol an nangyayaring aksidente sa tinampo.
Segun ki Chief Insp. Arthur Gomez, tagapagtaram kan Albay PNP, kulang kaya sinda sa traffic law enforcers asin kulang man an kaaraman kan mga pulis dapit sa batas trapiko asin ordinansa.
Huli digdi, inirekomendar kan Albay PPO an regular na pagkondusir nin safety education seminars na pamamayuhan kan local government units (LGUs) asin Land Transportation Office (LTO) na target an mga nagbabalgar na drivers.
Magigin istrikto naman an Albay police sa pagpautob nin eksistidong mga ley sa tinampo, rules and regulations arog kan “no permit, no travel policy,” helmet law asin Drunk Driving Act.
Segun pa ki Gomez, madesignar man sinda nin personahes ngane na ipautob an mga ordinansa urog na tuyong banggi asin ieendorso man an ordinansa na nagre-regulate asin nagtatao nin dugang na rekisitos sa pagbakal nin motorsiko arog kan driver’s license, motor vehicle OR/CR asin safety gears.
Gigibuhon suboot ninda an mga rekomendasyon na ini huli sa sa enot pa sanang kwarter kan taon, nairehistro na kan Albay PPO an 804 vehicular accidents.
Dugang pa ni Gomez, piglalaoman na ninda an mas dakol na aksidente na mangyayari ngunyan na bulan huli sa ini man an puon kan pagbyahe kan mga motorista sa manlaen-laen na destinasyon kasabay kan pag-obserbar kan Semana Santa asin pagpuon kan bakasyon kan mga estudyante.
