LEGAZPI CITY—-Mas pigpapahigot pa kan Albay Police Provincial Office an pagbabantay sa mga katawohan ngunyan na holiday season.
Segun ki Police Colonel Julius Añonuevo, an provincial director kan Albay Police Provincial Office sa intrevista kan Bombo Radyo Legazpi, na nag-deploy na sinda nin mga kapulisan sa manlaen-laen na parte kan probinsya.
Dugang kaini na supisiente an saindang pig-deploy na mga personahes sa mga simbahan para mabantayan an mga nagsisimba lalo na pag madaling-araw.
An saindang opisina nakikipagkoordinar naman sa mga tanod kan mga barangay para mabantayan an mga parasimba asin dugang pa digdi may naglilibot man na mobile patrols an saindang opisina para maasigurar na ligtas an mga naglalakaw sa pag-atendir kan misa.
Nagpatanid man an opisyal sa publiko na ibitaran an paglakaw sa mga madidiklom na lugar lalo na pag Simbang Gabi asin magdara nin mga panangga sa uran huli na man kan namamateang pag-uuran sa probinsya.
