LEGAZPI CITY- Epektibo na an Executive Order No. 30 Series of 2022 na ipinaluwas kan provincial government of Albay na obhetong babaan an presyo kan gravel and sand.
Segun ki Albay Governor Noel Rosal sa intrevista kan Bombo Radyo Legazpi, makalihis na ipapundo an quarry operations huli sa nagkapirang bayolasyon, nahiling an pag-take advantage kan iba na piglangkawan an presyo kan saindang gravel and sand.
Sa irarom kan bagong kasuguan kan gobernador, ibinaba an delivery rate kan baybay sa P400 kada cubic meter mantang an gravel an nasa P550 kada cubic meter sa enot na limang kilometro. Madugang sana nin P10 sa kada cubic meter sa mga succeeding kilometer.
Afuera digdi, ibinaba man an environment tax hali sa P50 kada cubic meter pasiring sa P25 kada cubic meter kun sa laog nin Albay an delivery.
Paliwanag kan alkalde na sa paagi kan nasabing lakdang, wara nang rason an mga retailers na maglangkaw kan saindang presyo na labing nakaka apektar sa mga konsumidores.
Tinawan duon man ni Governor Rosal na libre sa pagbabayad nin buwis an mga saradit na parasurod nin graba ngani na magkaigwa man nin ganansya an mga ini.
Mientras tanto, ipinagpapasalamat kan opisyal an pagigin bukas kan mga quarry operators sa nasabing lakdang huli ta naipasabot man suboot sa mga ini an nasabing development.
Napag-araman na sa 200 na mga quarry operators nasa 36 pa sana an pigtutugutan na mag-operate makalihis na makapag comply kan governor’s permit, ECC, location clearance asin DPWH certificate na nagpapatunay na wara sa laog nin 1 km kan government infrastructure an saindang quarry location.
Mientras tanto, nagpatanid man an gobernador sa mga mabayolar sa mga esksistidong polisiya na makakanselar an permit kan mga ini asin inasegurar na warang mangyayaring padrino system.
