LEGAZPI CITY—Nakatalaang makaresibi nin insentibo an mga atleta kan Albay Division na mapartisipar sa Palarong Pambansa sa mga masunod na aldaw ngunyan na bulan kan Mayo 2025.
Segun ki Schools Division Office Albay Spokesperson Froilan Tena, sa intrevista kan Bombo Radyo Legazpi, makakaresibi an mga atleta nin P2,000 sagkod P5,000 na gikan sa gobierno provincial kan Albay.
Sinabi kaini na kun pira an nakuwang medalya iyo man an mareresibing sumatotal na insentibo.
Labi sa 40 atleta gikan sa Albay an makakaresibi kan nasambitang insentibo kun saen prayoridad digdi an mga atleta sa Palarong Pambansa.
Dugang kan opisyal na an mga dae man nakaiba sa Palarong Pambansa makakaresibi man liwat nin insentibo bago pa man matapos an bulan.
Mientrastanto, nakatalaang magkundusir nin send-off ceremony sa Lunes, Mayo 19, 2025 para sa mga atleta na mapartisipar sa Palarong Pambansa.
