LEGAZPI CITY – Puga-puga na an pigsasagibong lakdang an mga opisyales kan Barangay Dapdap, Legazpi City makalihis makumpirmar na may duwa sindang residenteng aki na nagpositibo sa helang na dengue.
Segun ki Punong Barangay Glenn Barcelon sa intrevista kan Bombo Radyo Legazpi na plano nindang pahiguton an saindang Aksyon Barangay Kontra Dengue campaign kabale siring man an Search and Destroy activity sa mga pwedesir na magin breeding sites kan mga lamok.
Punto niya na kaipuhan na pahiguton an saindang kampanya nganing mapugo an pagdakol kan mga residente nindang pigtatamaan kan naunambitang helang.
Ini suboot an enot na bes sa laog nin pirang taon na may tinamaan nin dengue sa saindang Barangay kun kaya tulos ninda ining piggibuhan nin aksyon.
Pighagad man kan opisyal sa saiyang mga kahimanwa na tabangan sinda dapit digdi mantang nagsasagibo na man nin house-to-house information drive an saindang mga health workers nganing maimpormaran an mga residente urog na an nasa 300 meters hale sa lugar kan nagpositibo.
Nakatalaan man sindang magmukna nin ordinansang nagsusugo sa saindang nasasakupan na maglinig sa saindang palibot asin kaharongan nganing maibitaran an mga siring kaining insidente.
Paki-olay man ni Barcelon sa saiyang mga residentes na manteniron an kalinigan sa saindang mga kaharongan huli ta warang pigpipiling pamilya an dengue na pwedesir ikagadan kan siisay man na magpopositibo.
