LEGAZPI CITY-Binatikos kan Akbayan Partylist si Senator Robin Padilla katakod kan pigbubusol kaining propwesto na ibaba an edad kan criminal responsibility poon 10-anyos sagkod 15-anyos, kasunod kan nangyaring pambabadil sa San Jose National High School sa Tacloban City.
An insidente kan Hunyo, ikinagadan kan tulong estudyante makalihis an pambabadil kan duwang menor de edad na suspek.
Sa sarong social media post, sinabi ni Akbayan Party-list President Rafaela David na gari pigsa-samantala suboot kan senador an
trahedya ngani ibusol an propwesto na saindang pigtutulan.
Dagdag pa niya, “Preso para sa mga kaakian, alagad takas para kay Bato?”.
Tinawan doon kan grupo na an pagkakakulong kan mga joven, dai maikokonsiderang epektibong rehabilitasyon, orog na dai pa ganap an saindang pagkaaram sa tama asin mali.
Nagpaabot man nin pakikidumamay an grupo sa mga pamilya kan mga biktima kan pambabadil, alagad nangapudan na dai dapat gibohon na basehan an trahedya sa mga polisiya na posibleng magkawsa nin mas dakulang danyos sa mga jovenes asin sa komunidad.
Nagpatanid man an grupo sa publiko kontra sa paggamit kan trahedya sa pagbusol kan mga lakdang na posibleng makapag-paluya sa proteksyon kan mga jovenes sa sosyedad.
