LEGAZPI CITY – Nagpasiring sa Occidental Mindoro si Agriculture Secretary Emmanuel Pinol tangarig na liwat na makaolay an mga parasira na biktima kan pigsasabing maritime incident na nangyari sa pagultanan kan barko kan China asin bangka kan mga Pinoy.
Sa intrevista kan Bombo Radyo Legazpi ki Occidental Mindoro Lone District Rep. Josephine Sato, nag-abot nin tabang an sekretaryo sa mga nasabing parasira.
Alagad sa ibong kaini, mas hirarom na tabang suboot an kinakaipuhan kan mga parasira partikular na an “kugos” sa mga naagrabyado kan piglalaomang matabang digdi.
Aminado man si Sato na kadaklan sa mga parasira an dae na muna nagpapasiring sa Recto Bank kun sain nangyari an pagbangga asin paglubog kan bangka kan mga Pinoy.
Natatakot suboot an mga ini na sainda man sunod na mangyari an insidente na suway sa direchos kan mga kahimanwa urog na sakop kan Exclusive Economic Zone (EEZ) kan nasyon an Recto Bank.
