LEGAZPI CITY — Nanangangapudan ngunyan nin tabang an nabayaan na agom kan minero na si John Phillip Grego na nagadan sa nagrasay na minahan sa Sitio Bagong Sirang Barangay Panique, Aroroy, Masbate.
Segun sa agom kan biktima na si Arlene Grego, dae niya maaraman ngunyan kun sain makua nin gagastuson sa pagpapalubong sa agom huli ta wara pa suboot sindang nareresibe na tabang pinansyal apwera sa ipinaabot ni Board member Jamon Espares na personal pang nagpasiring sa saindang harong.
Hasta sa ngunyan dae pa suboot nakikipagkoordinar sa sainda an Filminera Resources Corporation ngani na magtao nin ayuda maski pa sa saindang minahan nagadan an saindang padre de pamilya.
Dugang pa ni Arlene na dae niya aram kun papano bubuhayon an tulong saradit pang mga aki ngunyan na wara na an saiyang agom na katabang niya sa pagtatrabaho.
