LEGAZPI CITY-Sinuspinde kan Land Transportation Office (LTO) an lisensya kan sikat na Vlogger sa Palawan, makalihis manotarang warang sulot na helmet mantang nagda-drive.

Tulos na nagpaluwas nin Show Cause Order (SCO) laban sa Vlogger makalihis mahiling an mga ladawan asin videos sa social media kun sain nagmo-motor ini nin warang helmet.

Susog sa ahensya, igwang lunad an Vlogger asin parehong warang mga helmet, siring man an iba pang kaiba kaini mantang nagjo-joyride.

Katakod kaini, nahiling pa an vlogger na nagkukua nin mga ladawan mantang nagmamaneho, na nagbusol sa ahensya na i-flag ini bilang “reckless driving”.

Sa irarom kan SCO, pinagbotan an vlogger na mag-atubang sa LTO Palawan District Office sa Nobyembre 24, 2026 asin magsumiter nin sinumpaan na paliwanag manungod sa mga pigsasabing pagbalgar.

Pinatawan man ini nin 90-day preventive suspension sa saiyang driver’s license asin pigmanduhan na isuko tulos ini sa district office.

Mientras tanto, sa ibong na lado, naghagad man nin dispensa an Vlogger sa saindang mga followers asin sa mga otoridad.

“My Bad guys! Mali tayo, mali. Kaya tanggap lang… Mali tayo dito fam. Sorry, sorry. Di na mauulit sa abot ng ating makakaya. Wag tularan ha. Safety first,” pahayag kaini sa social media.