LEGAZPI CITY-Piglinaw ni House Senior Deputy Speaker asin South Cotabato 2nd District Representative Ferdinand “Dinand” Hernandez na warang katotohanan an mga sinasabing pigtutukar sa laog kan Kamara na pag-octaba kan pirilian sa 2028 o an pagpalawig kan termino kan mga incumbent officials.
Ini an pahayag ni Hernandez bilang kasimbagan sa sinabi ni Atty. Paolo Panelo, an tagapagtaram ni Bise Presidente Sara Duterte, na nag-alegar na pinag-oolayan kan nagkapirang mambabatas an posibleng “no-election” na senaryo, pagpalawig kan termino, asin paglipat sa sarong parliamentary form kan gobierno.
Pig-duon kan mambabatas na malinaw na pigtatawan nin kahulugan kan Konstitusyon an mga termino kan mga elihidong opisyal asin nagmamando kan regular na pirilian; kun kaya, an mga ini dai pwedeng baguhon sana kan mga lehislador.
Inagyat man kaini an mga nagpapalakop kan siring na mga alegasyon na magtao nin malinaw asin beripikado na impormasyon, kasabay kan pagidrumdom sa mga ini, na magin responsable kun naggigibo nin mga pahayag sa publiko.
Pigsierto ni Hernandez na an liderato kan Kamara, sa irarom ni Speaker Faustino “Bojie” Dy III, nagtetenir na nakatutok sa mga prayoridad na legislature—kabali na an propwestong 2027 national budget asin igagalang ninda an proseso kan eleksyon siring man an direchos kan mga Pilipino na magpili kan saindang mga lider sa taong 2028.










