Dinepensa kan House of Representatives (HOR) an paglilipat kan pirang pondo sa irarom kan propuestong 2027 national budget, huli sa maluyang paggastos kan pirang ahensya.
Napag-araman na nasa P15.33 bilyon na pondong pansakuna an dai nagamit asin pwedesir ilaan sa mga programa na mas madali na maisagibo.
Segun ki Bataan 2nd District Rep. Albert Garcia, senior vice chair kan House Committee on Appropriations, natukoy kan mga mambabatas sa mga pagdangog an mga programa na maluya an implementasyon asin igwang natatadang pondo.
Sinabi niya na ipiglipat an pirang pondo sa mga prayoridad na programa ngani maibitaran na magtenir na nakatengga an kwarta kan nacion mantang pinapakarhay kan mga ahensya an saindang sistema sa pagsagibo nin mga proyekto.
Tinawan-doon ni Garcia na mga piling programa sana an apektado kan mga pagbabago asin bako an kabilogan na badyet kan sarong ahensya.
Mientrastanto, sinabi ni FPJ Panday Bayanihan Party-list Rep. Brian Poe na P15.33 bilyon an dai nagamit na pondo kan Disaster Rehabilitation and Reconstruction Assistance Program sa irarom kan National Disaster Risk Reduction and Management Fund, basado sa tala kan Hunyo 30, 2026.
Segun ki Poe, nagin basehan ini kan pigpoproponir na amyenda ngani dugangan an quick response funds kan Department of Social Welfare and Development (DSWD) asin Department of Agriculture (DA).
Pinaliwanag ni Poe na nagtetenir an katuyuhan kan pondo para sa pagresponde sa mga kalamidad, alagad ililipat ini sa mga ahensya na mas madali makapagtao nin tabang sa mga nangangaipo.
Pighimok man ni Poe an mga senador asin civil society organizations na magtabang sa pagsusuri kun an mga programa na hababa an paggastos angkop na pagkukuanan nin pondo para sa mas tulos na pangangaipo.
Ginibo an paglilinaw sa tahaw kan mga kahaputan manungod sa P190 bilyong amyenda kan Kamara sa propuestong badyet.
