Ipinatupad kan Department of Agriculture (DA) an 60-days na import ban sa mga imported pork sa bisa kan Department Order 33 na iniluwas kan Nobyembre 7, tanganing magpatupad nin mga kaukulang safeguard measures para sa sektor kan agrikultura.
Kaiba sa mga pansamantalang ipinagbabawal sa irarom kan kasuguan an fresh, chilled, asin frozen swine carcasses asin half-carcasses, bone-in ham asin shoulders, iba pang bone-in cuts, siring man an mga fresh, chilled, asin frozen edible offal asin liver.
Segun sa manehamiento kan DA, ginibo an lakdang tanganing tawan nin proteksyon an lokal na industriya kan pag-oorig na nakakamati nin matinding pagkalugi na maabot sa P28 bilyon huli sa padagos na pagdagsa kan murang imported pork asin pagbaba kan farmgate prices.
Afuera sa pagtao nin mas patas na oportunidad sa mga lokal na magbababoy, tinutuyo man kan polisiya na mabawasan an epekto kan kompetisyon sa merkado sa pag-ultanan kan mga lokal na produkto asin imported goods.
Magigin epektibo an nasabing import ban 15 days makalihis na opisyal na mairehistro an kasuguan sa pahayagan, asin ipapadara man ini sa Bureau of Customs tanganing maisagibo an kaukulang implementing guidelines.
Kasunod kaini, sinierto kan DA na isusulong man ninda an pagtaas kan taripa sa mga imported pork tanganing mas mapakusog pa an proteksyon sa mga lokal na prodyuser sa nacion.
