LEGAZPI CITY – Sa ngonian wara pa man nin pagbabago sa presyuhan kan imported asin lokal na bagas digdi sa merkado kan ciudad kan Legazpi dawa ngani nakakaeksperyensya kita nin inflation sa bilog na nasyon.
Parehas pa man an presyuhan kan imported asin lokal na rice grains kun sain nagpapalo sa P45 hasta P57 pesos kada kilo an first class na bagong ani na lokal na bagas, sa premium asin tiger premium rice nagpapalo ini nin P54 hasta P58 pesos kada kilo.
Mantang, mas halangkaw ang presyo kan imported na bagas kun sain nagpapalo sa P60 pesos kada kilo an presyo kan cherry blossom rice asin peacock rice.
Sa naging babala kan Department of Agriculture tiglalaoman na posibleng paglangkaw kan presyo kan imported na bagas asin pataba susog sa pagbaba kan halaga nin piso kontra dolyar.
Sa satuyang magigirumduman pumalo na sa 9.5% an inflation rate para sa bulan kan Oktubre kun sain may limang porsyento (5%) ining dagdag kumpara sa nakaaging bulan kan Septyembre.
Sa lado kan pagkakan, nagtalaga nin 9.4% na paglangkaw an food inflation o pagmahal kan presyo nin mga kakanon para sa bottom 30% o mga tios na pamilya sa nasyunal na libel para sa bulan kan Oktubre ngonian na taon.
Mas hibaba ini kumpara sa 9.8% kan nakalihis na bulan.
Saro pa sa tighihiling na kawsa kan posibleng pagtaas kan presyo kan bagas sa merkado an El Niño o matinding init na nagpupuon nang mamatean sa rehiyon kan Bikol.
Alagad wara pa man na naging pagbabago sa presyuhan kan imported asin lokal na bagas dahilan sa naunambitan na matinding init kan panahon.
via Bombo Rashi Arciga
