Idadaos ngonian na Nobyembre 2 an ikalimang status conference ni dating Presidente Rodrigo Duterte sa International Criminal Court antes kan pagpoon kan trial sa kasong crimes against humanity sa Nobyembre 30.
Dai personal na ma-atendir si Duterte sa pagdangog makalihis aprubahan kan Trial Chamber III an kahagadan niya na talikudan an pag-atendir.
An mga abogado niya an mahampang sa korte para pag-orolayan an mga isyu konektado sa preparasyon kan paglilitis.
Kabali sa pag-oorolayan an listahan kan mga testigo kan prosekusyon, oras na itatao sa pagpresentar kan ebidensya, mga posibleng ebidensya na makakatabang sa depensa, asin mga lakdang para sa proteksyon kan mga testigo.
Kabali man sa agenda an schedule kan mga pagdangog, testimonya paagi sa audio-visual link, asin iba pang isyu konektado sa paglilitis.
Susog sa ICC, nakatalaan na magpoon an paglilitis sa Nobyembre 30, 2026 sa The Hague, Netherlands kun sain hahampangon ni Duterte an tolong bilang kan crimes against humanity konektado sa mga suboot pag-gadan asin tangkang pag-gadan sa irarom kan kampanya kontra droga poon Nobyembre 2011 hasta Marso 2019.
