Mantang dagsa an mga pasahero sa Parañaque Integrated Terminal Exchange (PITX) huli sa pag-obserbar kan Undas, wara pa naman suboot na fully booked na biyahe hasta Nobyembre 3, segun sa pamayo kan terminal.
Basado sa datos na iniluwas kan PITX, ngunyan na Nobyembre 1, nasa 32.56% ang booking status kan mga biyahe pasiring Bicol, 25.90% sa Laguna, Batangas asin Quezon o Labazon, 30.19% sa North Luzon, 9.09% sa Mindoro, asin 19.64% sa Visayas asin Mindanao.
Para man sa mga biyahe sa Nobyembre 2, nasa 26.03% ang booking status pasiring sa Bicol, 6.70% sa North Luzon asin 6.54% sa Visayas magin Mindanao. Wara pang nairerehistrong booking para sa Laguna, Batangas, Quezon asin Mindoro.
Piglalaomang mas diit an mga mabiyahe sa Nobyembre 3, kasabay kan pagbabalik kan mga klase asin trabaho. Nasa 5.90% ang booking status pasiring Bicol asin 4.02% sa North Luzon, mantang wara pang booking sa Labazon, Visayas asin Mindanao, asin Mindoro.
Mientrastanto,Oktubre 30 nairehistro an pinakahalangkaw na dagsa kan pasahero sa mga rutang binabantayan kan PITX. Nag-abot ini sa 72.17% para sa Bicol, 50.54% sa Labazon, 65.21% sa North Luzon, 41.35% sa Visayas asin Mindanao, asin 62.50% sa Mindoro.
Sa ibong kan dae pa lubusang napapanong mga biyahe sa mga rutang ini, nag-abot na sa 1,439,613 an kabilogang numero kan mga pasaherong nag-agi sa PITX puon Oktubre 25 hanggang alas-4 nin hapon kan Nobyembre 1.
Sa nasabing aldaw, 124,882 pasahero ang nairehistro sa terminal.
Piglalaoman kan PITX na maabot sa dae mababa sa 1.8 milyon an mga pasaherong magamit nin terminal puon Oktubre 25 hanggang Nobyembre 4.
Ibinaba kan terminal nin 10% o katumpad nin 210,000 pasahero ang piglalaomang numero kan mga biyahero ngunyan na Undas.
Isinaalang-alang kaini an posibleng pagdakol kan mga mabiyahe sa Nobyembre 16 hanggang 18, na idineklarang special non-working days sa Metro Manila nganing tawan dalan an mga summit kan Association of Southeast Asian Nations (ASEAN) asin mga kaugnay na pagtitipon.
