LEGAZPI CITY-Ipig-sugo kan Office of the Ombudsman an anom na bulang preventive suspension nin warang bayad sa limang project engineers kan DPWH Bulacan First District Engineering Office.
Kaiba sa mga suspended engineers sina Irene D. Ontingco, Kevin A. Geronimo, John Michael E. Ramos, Bernardo P. Villafuerte, asin Michelle C. Cruz, huli suboot sa pagkakaimbuelto sa P188.8-milyong ghost flood control projects sa Baliuag, Bulacan.
Nahahampang sa mga administratibong kaso an mga nabanggit na persona, arog kan grave misconduct, serious dishonesty, asin gross neglect of duty katakod kan tulong proyekto kan reinforced concrete slope revetments kan taong 2024.
Nagluluwas sa imbestigasyon na ginibo suboot kan mga engineers an pagpapatalsik asin pagpapeke kan mga dokumento sa inspeksyon, pagresibe, asin pagbabayad ngani magmukhang lehitimo an mga proyekto.
Ipighayag kan Ombudsman na kaipuhan an suspensyon huli sa makusog na ebidensya asin ngani malikayan an anumang pagtatangka na maimpluwensyahan an mga saksi mantang padagos an imbestigasyon.
Dae man kabale sa kasuguan si dating Officer-in-Charge District Engineer Brice Ericson D. Hernandez asin dating Assistant District Engineer Jaypee D. Mendoza huli ta wara na an mga ini sa aktibong serbisyo sa gobierno.
