LEGAZPI CITY– May bagong development an Police Regional Office 5 sa imbestigasyon sa pambabadil-gadan sa lokal na broadcaster na si Adrian Loterte.
Segun sa PRO5 sa saindang official post kaining Oktubre 28, 2026, basado sa padagos na pag-analisa kan PNP Forensic Group – Firearms Identification Section, may kumpirmadong ballistic match na nakua sa mga ebidensya.
Nagkapareho an narekober na slugs asin cartridge cases sa crime scene sa ballistic characteristics kan sarong kalibre .45 na badil na konektado suboot sa dati nang nairehistrong insidente nin pambabadil.
Segun pa sa PRO5, dakulang tabang an forensic breakthrough na ini tanganing magkaigwa nin konkretong lead sa pagbisto sa mga salarin.
Sinierto kan PRO5 na agresibo nindang pigtutukan an lead na ini asin ginagamit an gabos na forensic tools asin intelligence information tanganing mapanagot an mga responsable.
Nangapodan man an PRO5 sa publiko na kun igwang impormasyon manungod sa kaso, makipagkoordinar tulos sa saindang opisina o sa pinakaharaning police station.
