LEGAZPI CITY-Nagtestigo sa Sandiganbayan Fifth Division si dating Department of Public Works and Highways (DPWH) Secretary Manuel Bonoan katakod kan petisyon para sa piyansa ni Senador Jinggoy Estrada.
Sa saiyang testimonya, ipigbuyagyag ni Bonoan na naghagad suboot si Estrada nin mga proyektong nagkakantidad nin P1 bilyon ngani makaiba sa pambansang badyet sa paagi ni dating DPWH Undersecretary Robert Bernardo.
Segun kay Bonoan, pinalutang an kamawotan para sa dagdag na pondo huli sa posisyon kan senador bilang Senate President Pro Tempore asin ipig-konektar ini sa suboot gastuson sa eleksiyon.
Mantang P1 bilyon an hinagad na kantidad sa irarom kan Senate Leadership Fund, nagabot sana suboot sa P700 milyon an opisyal na naaprubaran sa General Appropriations Act (GAA).
Kan haputon kan kampo kan depensa mapadpait sa saiyang kasiertuhan, nanindugan an dating kalihim na wara siyang rason ngani magduda huli ta mag-amigo suboot sina Estrada asin Bernardo.
Napag-araman na dating nagserbing district engineer sa Maynila si Bernardo kan panahon kan panunungkulan kan ama kan senador na si dating Presidente Joseph Estrada bilang alkalde kan ciudad.
Sa ngonian, wara pang tugon an kampo kan senador sa mga naging pahayag ni Bonoan sa hampang kan mga mahistrado.
Naglalaom man ining matawan an hirit na makapaglagak nin piyansa ngani makabalik sa trabaho sa Senado.
