LEGAZPI CITY-Ipinahayag kan Philippine Coffee Board Inc. (PCBI) na mas naglalangkaw an presyo kan kape sa nacion mantang limitado an global supplies, nagkakaigwa nin delay sa shipment asin hababang produksyon.
Posible suboot mag epekto pa ini sa maabot na Disyembre sagkod sa enot na kwarter kan taong 2027.
Susog kay PCBI director Ceasario Rex Kapunan na an darakulang chains an naga-absorb kan dagdag na gastor, mantang an mga saradit na tindahan an mas flexible sa paglangkaw kan presyo kan kape.
Dagdag pa kaini na bako gabos na kape an naglalangkaw an presyo, igwa man na mas kontrolado an presyo sa merkado.
Mientras tanto, nganing mamantenir an gastos, naghahanap nin iba pang alternatibo an mga café owners asin coffee roasters gikan sa Brazil, bilang ini an nangengenot na supplier nin kape sa kinaban.
Susog sa Food and Agriculture Organization of the United Nations, an kape an pinakadakul na pig-aangkat na tropical agricultural product, kun sain igwang 25 million farming households an nagpo-produsir nin 80% coffee output sa bilog na kinaban.
Afuera sa Brazil nangengenot man na supplier nin kape sa kinaban an Vietnam asin Colombia, mantang pinaka nagkokonsumo naman an European Union asin Estados Unidos.
Padagos man sa pag-import nin bastanteng volume nin kape an Pilipinas ngani mamantenir an domestic demand, kun sain nasa 40% an kinakaipuhang suplay kaini.
