LEGAZPI CITY—Pabor an grupo nin mga parasisira na ideklarang persona non grata si Chinese Ambassador Jing Quan makalihis an nagin pahayag kaini na madaling madadaog kan China an Pilipinas kun magamit ini nin pwersa kun sain nilinaw man kan ambassador na bako ini an kamawotan kan Beijing asin obhetong imantinir an katoninongan.
Segun ki Pambansang Lakas ng Kilusang Mamamalakaya ng Pilipinas Spokesperson Salvador France, sa intrevista kan Bombo Radyo Legazpi, pabor sinda na ideklarang persona non grata an opisyal huli sa mahambog ining nagbutas nin siring na pahayag mantang yaon ini sa teritoryo kan Pilipinas.
Katakod kaini padagos an pangapudan ninda na diplomasya an simbag sa isyu asin dae ipagdamay an mga parasisira o sibilyan sa iriwal sa West Philippine Sea.
Pagdoon ni France na dae ninda kukunsintihon an pigggigibo kan embahada kan China na ‘naghahadi-hadian’ sa nacion.
Pangapudan kan opisyal na makisumaro sa protesta sa embahada kan China na dae magtugot bilang mga Pilipino asin bilang mga parasira na sinda an “maghadi-hadian” sa nacion.
Siring man an mensahe kaini sa gobierno na dae magpadalos-dalos huli sa dae ini maaagi sa kahambogan, siring man na dae ipaglaom na idedepensar kan Japan asin US an Pilipinas sa mga siring na orolay huli sa iwawalat kaini an Pilipinas siring kan dati.
