LEGAZPI CITY-Pinaglalaoman na maglaog sa Philippine Area of Responsibility (PAR) an Super Typhoon Champi sa aldaw nin Martes asin papangaranan ining ‘Rosal’.
Huring nahiling an bagyo sa rayong 2,260 km east kan Southern Luzon (13.1°N, 144.6°E).
May kusog an parus kaini na nasa 185 km/hour harani sa sentro asin pagbugso na nasa 230 km/hour, mantang naghihiro pasiring sa west northwestward sa rikas na 25 km/hour.
Segun ki Weather Specialist Melvin Almujela, sa intrevista kan Bombo Radyo Legazpi na an bagyo posibleng igwang hababang tsansa na maglandfall sa kadagaan sa presente.
Alagad pwedisir ining magkusog mantang paparani sa Philippine Area of Responsibility asin piglalaoman na magre-curve pasiring sa Taiwan o China.
Dae man liwat pighahale na magbago an aagihan na lugar kan bagyo, alagad piglalaoman na makakaapekto sa rehiyon an trough o extension kaini.
Mientras tanto, sa Kabikolan, makakaeksperyensya nin mapanganuron na kalangitan, kalat-kalat na pag-uuran, pagkikilat asin pagdaguldol huli sa epekto kan Easterlies asin Intertropical Convergence Zone (ITCZ).
An parus sa rehiyon, magigin maluya sagkod moderato asin an baybayon naman magigin banayad sagkod moderato an pag-hukol.
