LEGAZPI CITY-Nagpapadagos sa pagkusog an Tropical Cyclone Champi asin nakalaog na ini sa kategoryang typhoon, susog sa state weather bureau.
Basado sa 8:00 a.m. weather bulletin, namasdan an bagyo sa rayong 2,520 kilometro subangan kan Eastern Visayas, may kusog nin duros na minaabot sa 140 kilometro kada oras asin pagbugso na sagkod 170 kilometro kada oras.
Naghihiro ini pasiring sa westward sa rikas na 25 kilometro kada oras.
Pinaglalaoman na makalaog an bagyong Champi sa Philippine Area of Responsibility (PAR) sa Martes asin papangaranan ining “Rosal”.
Naghihiro man ini sa Philippine Sea, pasiring Taiwan asin igwang sadit na posibilidad na direktang mag-landfall sa arinman na parte kan nacion.
Alagad, posibleng makaapektar sa sirangang parte kan nacion an trough o extension kan bagyo sa huring parte kan masunod na semana, partikular sa Northern Luzon.
