LEGAZPI CITY-Pigpapaotob na kan Department of Agriculture (DA) an dakulang relief effort para sa mga paraoma asin parasira na apektado kan makusog na habagat asin mga nakaaging bagyong Luis, Maymay, asin Neneng.
Segun sa DA Disaster Risk Reduction and Management Operations Center, labi sa 600 milyones de pesos an pig-alokar kan ahensya para sa agricultural inputs arog kan paroy, mais, asin semilya nin gulayon.
Nagdistribwir man an National Food Authority (NFA) nin labi sa siyam na ribong sako nin bagas sa mga apektadong lokal na gobierno sa Ilocos, Cagayan, Central Luzon, asin MIMAROPA.
Katakod kaini, an Philippine Crop Insurance Corporation nagpaluwas nin labi sa 35 milyones de pesos na “indemnification” para sa limang ribong paraoma asin parasira na nakarehistro sa irarom kan saindang programa.
An Agricultural Credit Policy Council pigeenganyar an saindang Survival and Recovery Loan Program na may maabot sa 25 mil de pesos na interest-free loans na mababayadan sa laog nin tulong taon.
Padagos an pakikoordinar kan DA regional field offices sa mga lokal na gobierno asin disaster council ngani masierto an marikas na paghatod kan asistensya sa mga apektadong sektor.
