LEGAZPI CITY-Nagsagibo an Philippine National Police Regional Office 5 nin case conference makalihis an nangyaring pambabadil sa broadcaster na si Adrian “Golden Boy” Loterte sa Daraga Albay.
Durante kaini, ipigheras kan pulisya sa media an CCTV Footage kun sain mahihiling an riding-in-tandem na suspek sa pambabadil ki Loterte sa Barangay San Roque, sa nasambitang banwaan.
Pinangenotan man ini ni Philippine National Police Regional Office 5 Regional Director Police Brigader General Randy Glenn Silvio asin Albay Police Provincial Office Provincial Director Police Colonel Noel Nuñez.
Ipigpresentar digdi kan task force group an nagkapirang nakuang impormasyon mapadapit sa mga suspek asin pinag-aadalan na an posibleng mga konektado sa insidente.
Susog sa pulisya, nagsapar nin tama kan kalibre.45 nin bala an hawak kan biktima na nagresulta kan saiyang pagkagadan.
Marurumdumang pinagbabadil si Loterte kan hapon kan Oktubre 12 sa laog kan saiyang sadiring bakery sa Barangay San Roque, Daraga, Albay.
Mientras tanto, kinondena man kan nagkapirang opisyal sa provincia asin miembro kan media an pananambang sa nasabing broadcaster.
