LEGAZPI CITY—Binawian nin buhay an sarong 94-anyos na lola makalihis an nangyaring kasulo sa Purok 3, Barangay Tagas, Daraga, Albay.
Segun ki Bureau of Fire Protection Daraga Fire marshal Fire Senior Inspector Edgar Tañajura Jr., sa intrevista kan Bombo Radyo Legazpi, nakaluwas an lima na miyembro kan pamilya sa nasulong harong, kabale an duwang joven, lolo, asin mag-agom. Alagad nawalat sa nasusulong harong an nasabing lola.
Segun sa nakaolay na miyembro kan pamilya, na pigporbar pang isalbar an saindang lola alagad dae na suboot ninda ini nailuwas.
Itinaas sa first alarm an kasulo na nagpuon nin ala-1:13 na maagahon asin idineklarang fire out nin ala-1:52 na maagahon kan Huwebes, Agosto 20.
Basado man sa salaysay kan nakaolay nindang indibidwal na mamamasada kuta an may napansin suboot ini na aso na gikan sa gari cellphone repair shop sa enotan asin marikas na naglakop an kalayo.
Huli sa nasa parteng hurihan sinda na iyo na kaya dae tulos makaluwas, an uminagi ini sa ibong na pader asin naglusot sa rinaot na bubong.
Dugang kan opisyal na nagsapo man nin lugad an mga biktima.
Kabale man sa nadamay an pirang behikulo siring kan kotse asin motor.
Pigkarkulong maabot sa P240,000 an inisyal na danyos sa nasabing kasulo.
Sa presente, nagpapadagos an imbestigasyon kan mga otoridad mapadapit sa insidente.
