LEGAZPI CITY-Mas pinakusog kan Bureau of Fire Protection (BFP) Masbate an preparasyon para sa nagdadangadang na Kapaskuhan asin Bagong Taon, partikularmente sa pagpugol nin kasulo na pwedesir magresulta kan paggamit nin paputok, boga, asin mga de-kuryenteng kagamitan.
Segun ki FO1 Reden Invento, Public Information Officer kan BFP Masbate, nagpapadagos an kampanya kan ahensya kontra sa paggamit nin mga paputok asin boga, na posibleng magin kawsa nin kasulo.
Imbes na paputok asin boga, pig-eenkaminar kan BFP an publiko na maggamit nin mas ligtas na alternatibo, arog kan torotot asin iba pang paagi nin paggibo nin tanog na dai naggagamit nin paputok.
Padagos man an “Palit-Boga Program” sa ibang fire stations, kun saen an boga pwedisir ilipat sa torotot o bagas.
Manungod man sa personnel deployment, sinabi ni Invento na an mga naka-duty na personnel pigpapa-recall, mantang an mga naka-off duty pwedisir magsagibo nin augmentation sa ibang fire stations na nangangaipo nin dugang na tawohan.
Segun pa sa opisyal, mas nagbababa na an mga insidente nin kasulo na may kinaaraman sa paputok, asin warang nairehistro na arog kaining insidente kan nakaaging taon.
Kadaklan suboot sa insidente nin kasulo may koneksyon sa mga kagamitan na de-kuryente.
Huli kaini, pig-iinspeksyun kan BFP an mga dekorasyon na piggagamit sa Kapaskuhan tanganing masigurar na ligtas an mga ini.
Nagpagirumdom man an opisyal sa mga residente na mag-ingat, magmatiyag sa palibot, asin ireport an mga posibleng peligro, partikularmente na igwang huma kan El Niño, na pwedesir magdugang sa peligro nin kasulo.
Nangapudan man ini sa publiko na itago o i-save an numero kan pinakaharaning fire station sa saindang cell phone tanganing madali ining maapudan sa panahon nin emerhensya.
