Inihayag ni Vice President Sara Duterte na nakadepende pa kun maatendir siya sa impeachment trial makalihis banggitin kan house prosecution an posibilidad na isalang siya bilang witness.
Segun ki Duterte na wara pa siyang nareresibe na anuman na pagpapaapod hali sa Senate impeachment court.
Pigduon man kan bise presidente na an impeachment an sarong legal na proseso asin an paghampang kan saiyang mga abogado sa Senado an pigkokunsiderar niyang appearance asin participation sa nasabing proseso.
Mientras tanto, ipighahanda na man kan kampo ni Vice President Sara an depensa enkasong ihampang bilang hostile witness si Davao City Mayor Sebastian “Baste” Duterte sa impeachment trial kan saiyang tugang.
Segun ki defense lawyer Justin Gular, natanggap na ninda an kopya kan subpoena para kay Baste, alagad dae muna ninda ipapaluwas an magiging paghahanda hasta sa dae ninda nahihiling an magiging testimonya kaini asin mga dokumentong pwederis na ihampang.
Marurumduman na kan Martes, personal na nagpasiring sa Davao City an duwang tauhan kan Senate Office of the Sergeant-at-Arms ngani na ihatod an subpoena.
Pigsugo si Baste na maghamoang sa Senate impeachment court puon Setyembre 28 hanggang 30, bilang witness kan house prosecution.
