LEGAZPI CITY- Ikinaugma kan Partido Manggagawa na dakol na mga jovenes an nagpartisipar sa mga paghiro na ikinasa kan manlain lain na grupo sa bisperas asin sa mismong aldaw kan komemorasyon kan Martial Law.
Segun ki Partido Manggagawa Chairperson Rene Magtubo sa intrevista kan Bombo Radyo Legazpi na nagpapahiling ini na dakol na mga jovenes an may pakiaram sa historya.
Nagsasalming man suboot ini sa kamawotan kan mga Pilipino na makipaglaban para sa pagkakaigwa nin tunay na demokrasya, sarong tunay na gobierno asin paglaban sa panghahabon sa kaban ng bayan siring man sa problema sa political dynasty.
Nahiling man an padagos na pagkurahaw kan mga obrero na ipaglaban an saindang mga diretsos sa mas halangkaw na pasahod asin pangapudan nin solusyon sa halangkaw presyo kan babarakalon asin pagkakaigwa nin tunay na pagbabago.
Nanindugan si Magtubo na ang kalayaan an bako kusang ipigtatao kundi ipinaglalaban.
Ini urog na sa presenteng panahon na an gobierno suboot an nagtetenir na kontrolado kan mga darakulang kapitalista na nagbibilog nin polisiya na dae nagtataong solusyon sa interes kan mga namamanwaan.
