Magsasagibo nin caucus ngunyan na Lunes an mga senator-judge ngani na tukaron an gagamiton na voting threshold sa paghatol kun guilty o pagpapawarang sala ki Vice President Sara Duterte sa nagpapadagos na impeachment trial.
Segun ki Senator-Judge JV Ejercito, pag-oolayan kun kinakaiuhan na mag-agi sa botohan an bilog na impeachment court o kun pwedesir na resolbaron kan presiding officer sa paagi kan consensus kan mga miyembro.
Inihayag ni Ejercito na kaipuhan pa niya nin bastanteng oras ngani na hilingon an mga pananaw kan mga amici curiae o resource persons kan nakalihis na semana antes magluwas nin pormal na boto, mantang tinawan duon an pinaka importante na warang mababayolar na probisyon kan Saligang Batas.
Nagtutubod man si Senator-Judge Panfilo “Ping” Lacson na dae dapat hidalion an pagdedesisyon asin posibleng dae pa magkaigwa nin botohan sa Setyembre 23, urog na kun igwang mahagad nin dugang na panahon ngani na masuri an mga diskusyon sa isasagibong oral argument.
Mientras tanto, nagsayuma man na magtao nin pahayag si Senate President asin Presiding Officer Sherwin Gatchalian ngani na dae pangenotan an kakaluwasan kan saindang diskusyon sa caucus.
Pinaglalaoman na magigin bunga kan pag-oolay ngunyan na aldaw kun magigin basehan sa mga masunod na lakdang kan Senate Impeachment Court antes an pormal napaghato sa kaso kan bise presidente.
