LEGAZPI CITY-Gadan an sarong 9-anyos na estudyante asin nairido naman an duwang kaparientes kaini makalihis na mabangga kan sarong pampasaherong jeep an saindang motorsiklo sa luwas kan eskwelahan sa San Vicente Elementary School sa Virac, Catanduanes.
Segun kay Virac MPS Chief of Police Police Major Kenneth Ding Gutierrez, sa intrevista kan Bombo Radyo Legazpi na kan nangyari an insidente tulos na nagrespunde an nagpapatrolyang pulis asin dinara an mga biktima sa ospital.
Alagad nagresulta ini sa brain hemorrhage kan aki na nagin kawsa kan pagkagadan kaini.
Basado sa imbestigasyo kan pulisya, nakaturog an driver asin nakabangga ini sa barrier kan eskwelahan kun sain yaon an nasabing pamilya.
Mientras tanto, dai man tinakasan kan driver an insidente asin sa presente nasa inquest proceeding na ini asin nakadetene sa Virac MPS dentention facility.
Mahahampang man sa duwang kaso nin Reckless imprudence resulting in homicide and physical injuries an driver kan nasabing jeep.
Nagpatanid man an pulisya sa mga drivers na enkaso magmaneho, sietuhon na maayos an behikulo asin an mga sadiri.
