Tinawan duon kan Office of the Ombudsman na dae suboot mabubura kan ‘recantation’ an mga ebidensya sa flood control cases kontra ki dating House of Representatives Speaker Martin Romualdez.
Segun ki Assistant Ombudsman Atty. Mico Clavano, bako eraser an pagbawi kan testimonya o pag-atras kan testigo ngani na mabura an katotoohan.
Ipigkokunsiderar kaini na ‘misleading’ an pahayag kan kampo ni dating Speaker Romualdez na nagtataran na igwang epekto sa kaso an pag-recant kan nagkapirang testigo.
Pigduon ni Ombudsman Spokesperson Clavano na alagad igwang pagbawi sa testimonya, magtetenir man liwat an nasabing pahayag.
An mangyayari sana suboot iyo an pagkumpara kan duwang salaysay ngani na madetermina kun ano an totoo.
Marurumduman na si Romualdez an nahahampang sa mga reklamong plunder, direct bribery, graft asin money laundering sa Office of the Ombudsman katakod kan maanomalyang flood control projects.
