LEGAZPI CITY-Nag-apela an liderato kan Overseas Workers Welfare Administration (OWWA) sa Kamara de Representantes na dagdagan an itinalaan na pondo kan ahensya para sa emergency repatriation program sa masunod na taon.
Nanindugan si OWWA Administrator Atty. PY Caunan na imbes na bawasan an pondo, mas marhay na dagdagan pa ngani na mas dakul pang Overseas Filipino Workers (OFWs) an matabangan asin matawan nin supisyenteng relief sa tahaw kan mga krisis sa ibang nacion.
Basado propwestong 2027 national budget, an alokasyon para sa emergency repatriation buminagsak sa P900 milyones, mas hababa sa P1.2 bilyones na pondo na itinatao taon-taon kan nakaaging tulong taon.
Paliwanag ni Caunan, dae magiging bastante an nasabing kantidad urog na padagos na nagraraot an sitwasyon sa Middle East asin iba pang rehiyon kun saen igwa nin rinibong mga obrerong Pilipino na posibleng kaipuhan tulos na evacuation.
Huli kaini, pormal na naghagad an OWWA nin dagdag na P575 milyones para sa saindang emergency repatriation fund para sa 2027, kasabay kan pag-admitir na naubos man an saindang regular repatriation budget huli sa padagos na pag-uli kan mga kababayan na na-trap sa kariribokan.
Ginibo ni Caunan an apela sa deliberation kan Kamara de Representantes mapadapit sa propwestong budget kan Department of Migrant Workers (DMW).
