LEGAZPI CITY-Tinawan doon kan Second Congressional Commission on Education (EDCOM 2) na may peligro na nakakaapektar sa kada eskwelahan asin komunidad an nagkapirang suspensyon na pigpapaotob kan gabos na institusyon sa panahon kan kalamidad
Kun kaya pigbubusol ngonian kan EDCOM 2 na amyendahan an Executive Order 66, s. 2012, na sa ngonian iyo an namamahala sa pagsuspinde asin pagbalik kan klase sa panahon nin bagyo, baha asin iba pang kalamidad.
Sinabi kaini na basado sa pinakahuring pag-analisar kan datos kan DepEd, an mga eskwelahan nawaran nin average na 15 aldaw kada school year huli sa calamity-related class suspension kan School Year 2024-2025 asin School Year 2025-2026.
Susog sa EDCOM 2, an Negros Occidental an pinakamasakit na single division, na nawaran nin 71 school days huli sa pirang bulan na pagtuga kan Bulkan Kanlaon, sinundan kan Canlaon City sa 61 days.
Sa Metro Manila, sinabi kan EDCOM 2 na 16 na dibisyon an nawaran nin 15 aldaw sa average, na haros bilog na pinapaandar kan epekto kan Southwest Monsoon asin bagyo.
Sinabi kaini na an pag-amyenda dapat magbugtak nin sistema para sa mga suspensyon sa klase, kabali an mga automatikong suspensyon, kun an mga nasyonal naabot na an prescribed hazard thresholds; localized suspension kan mga lokal na chief executives basado sa local risk assessments, scientific evidence, asin konsultasyon sa mga eskwelahan asin school-level suspensions naman basado sa kondisyon sa partikular na eskwelahan.
Susog sa EDCOM 2, an framework matugot man na magbalik an klase sa lebel kan eskwelahan, oras na an mga kondisyon ma-assess na ligtas na
Kasabay kaini, sinabi kan ninda na dapat man na siertuhon kan Department of Education (DepEd) an mga lakdang sa pagpapadagos kan pag-adal, na pigtutukduan an saindang report kun saen 37 porsyento sana kan mga paratukdo an igwa nin laptop asin 17 porsyento sana kan mga estudyante an igwa kan mga gadgets na kaipuhan para sa online learning, na ginigibong default shift sa online classes na bako realistiko para sa nagkapirang eskwelahan.
