LEGAZPI CITY-Labing 2,500 katawo an nagadan sa Ebola sa Democratic Republic of Congo, mantang an helang padagos na marikas na naglalakop sa sarong lugar na mas dakula pa sa France.
Segun kay United Nations Ebola coordinator Julien Harneis, na dai na nakakasabay an response operations huli sa marikas na paglakop kan outbreak.
Nangapudan man siya nin dugang na tabang huli ta posibleng maubos sa laog nin pirang semana an presenteng pondo kan organisasyon sa pag-atubang sa epidemya.
An presenteng outbreak, iyo an ika-17 na epidemya kan Ebola sa Congo asin kan huring parte kan Hulyo nalampasan an nakaaging pinakadakulang outbreak sa nasyon, na nangyari poon 2018 sagkod 2020.
An outbreak kawsa kan Bundibugyo species kan Ebola, na wara pang aprobadong bakuna o bulong.
Mientrastanto, nasa 160 na mga health workers an naulakitan asin 43 digdi an nagadan.
Apwera sa virus, nasa peligro man an mga health workers sa pag-atake kan nagkapirang residentes.
Sa nakaaging anom na bulan, labi sa 260 na insidente nin pag-atake sa mga health workers an nairehistro, kabale na an walong nagadan.
An mga ambulansya ginapo asin sinulo, asin nagkapirang mga pasilidad sa salud an inatake huli sa takot asin dagit kan mga residente.
May mga nagtutubod man sa salang impormasyon na gibo-gibo sana an outbreak.
Mientras tanto, sinabi ni Harneis na orog na naglala an problema huli sa pagbawas kan humanitarian aid kan mga nakaaging taon.
An mga awtoridad nasasakitan man na bayadan an rinibong mga tawohan na nagtatabang sa pagresponde sa Ebola huli ta apektado an mga serbisyo sa bangko pagkatapos na punduhon kan gobierno an mga komersyal na biahe na ginagamit sa pagdara nin kwarta sa mga bangko.
Huli kaini, an UN naghagad nin orog na suporta nganing mapakusog an medikal na pagresponde asin malikayan an padagos na paglakop kan Ebola virus.
