LEGAZPI CITY-Sinabi kan pulisya sa sarong hearing sa Senado kan Huwebes na an estudyante kan Ateneo de Zamboanga University (AdZU) igwa nin motibo na maglaog sa eskwelahan ngani magbadil bago maggadan kan saiyang sadiri.
Sa Senate Committee on Women and Children hearing, sinabi ni Zamboanga City Police Director Police Colonel Fidel Fortaleza na saro sa pighihiling na anggulo kan imbestigasyon, kun pano nakalaog an estudyante sa eskwelahan na bitbit an duwang lisensiyadong badil.
Apwera kaini, nagpahiling suboot nin intensyon an estudyante na ibitaran an security check ngani na mailaog an mga badil.
Basado sa inisyal na imbestigasyon kan mga otoridad, kinarga an estudyante sa sarong pickup truck, bitbit an sarong bag na may laog kan mga badil.
Imbes na mag-agi sa main gate kan eskwelahan kun sain may mga security guard. Ibinaba siya sa ramp area, kun saen mas dikit na mga tauhan sa seguridad an nakadestino.
Hale digdi, naglaog an estudyante asin nagduman sa ikaapat na palapag kan nasabing edipisyo.
Kinumpirmar man kan Board of Trustees Chairman kan eskwelahan na si Pedro Rufo Soliven na an ramp area pirmihang pigagamit kan mga persons with disability o mga estudyanteng igwang injury.
Sinabi man kaini na maabot sa 25 security guards an nakapwesto sa manlaen-laen na entry points kan nasabing eskwelahan. Enot ining nagpaputok nin badil sa Room 405, bago nagbalyo sa Room 404, kun saen tinamaan asin nagadan an saiyang kaeskwela.
Pakatapos kaini, nagsakat siya sa ikalimang palapag asin duman nagkomiter nin paggadan sa saiyang sadiri.
Susog sa pulis, an mga nagrespondeng nakahiling mismo kan pangyayari asin nagprobar na makipag-olay saiya na ibugtak an badil. Mientrastanto, nagpapadagos pa an forensic examination sa cellphone kan estudyante.
Pig-aaram man kan mga pulisya an posibleng responsibilidad kan ama kan estudyante na iyo an kagsadiri kan saro sa mga badil.
Mientrastanto, dae pa man pigkukumpirmar kan administrasyon kan Unibersidad an mga report na igwang dati nang huma sa eskwelahan bago pa man an nangyaring pambabadil.
Segun sa Board of Trustees Chairman padagos pa an an saindang imbestigasyon sa bilog na insidente asin habo nindang magpaluwas nin impormasyon na dae pa nabeberipika.
