LEGAZPI CITY—Takdag sa kamot kan mga otoridad an sarong high-value target individual sa ginibong buy-bust operation sa Purok 9B, Sitio San Isidro, Barangay Puro, Legazpi City.
Binisto an suspek na si alyas “Mark,” nasa legal na edad, warang agom, asin residente kan Barangay Bitano kan nasabing ciudad.
Nakumpiskar saiya an pigtutubudang shabu na may gabat na haros 60 gramos asin may standard value price na P408,000.
Afuera digdi, nakumpiskar man an liquid marijuana na may gabat na apat na gramos asin may street price na P10,000; apat na pidaso nin cannabis vape carts; sarong pidaso nin glass tube na may laog nin pinamarang dahon na may fruiting tops, magin an iba pang non-drug paraphernalia.
Pinangenotan an operasyon kan Philippine Drug Enforcement Agency (PDEA) Regional Office 5 – Regional Special Enforcement Team 1 katabang an PDEA Regional Office 5 – Barangay Drug Clearing Program, PDEA – Albay Provincial Office, PDEA Regional Special Enforcement Team 2 asin Legazpi City Police Station.
Nahahampang an suspek sa kasong pagbalgar sa Section 5 asin 11, Article II kan Republic Act 9165 o Comprehensive Dangerous Drugs Act of 2002.
