Ipinadara kan Pilipinas an 40 portable power generators ngani na makatabang sa mga komunidad na apektado kan padagos na pag-atake sa energy infrastructure kan Ukraine.
An mga Daiden generator an igwang kapasidad na tig-6 kilowatts, an uminabot sa sarong hub kan Ministry of Energy kan Ukraine kan Agosto 12.
Gagamiton ini para sa mga sibilyan, katabang an backup power para sa mga pasilidad na importante para sa mga komunidad.
Nagpuon an humanitarian initiative makalihis an naging meeting kan Pebrero ninda Ukrainian Ambassador Yuliia Fediv asin Senator Erwin Tulfo, na nagtabang ngani na maibusol an proyekto.
Itinao man kan Highball Traders Inc. an mga generator.
Ipinadara an mga ini hali sa Pilipinas pasiring sa Port of Gdansk sa Poland antes ihatod sa Ukraine sa paagi kan rescEU Donations Scheme rescEU Donations Scheme kan European Union Civil Protection Mechanism, sa tabang kan Governmental Strategic Reserves Agency kan Poland.
Pinaglalaoman na makakatabang an nasabing mga generator ngani na mamantenir an kuryente sa mga importanteng pasilidad asin mapakusog an kakayanan kan mga komunidad na magpadagos sa saindang pangenot na serbisyo sa tahaw kan mga pag-atake sa energy infrastructure kan Ukraine.
