LEGAZPI CITY-Nagkondusir na nin assessment asin beripikasyon an Bureau of Fisheries and Aquatic Resources (BFAR) Bicol mapadapit sa nai-report na fish kill sa Lake Buhi kan Agosto 8.
Segun kay BFAR Bicol Spokesperson Rowena Briones, sa intrevista kan Bombo Radyo Legazpi, na basado sa resulta kan saindang pagbusisi hababa an ‘dissolve oxygen’ sa hibsabaw asin tahaw na parte kan lawa.
Paliwanag kan opisyal na enkaso hababa ini, igwang epekto sa mga sira o sa mga stocks na nasa lawa.
Saro suboot ining natural phenomenon asin dai tinuyo an insidente.
Senyales man suboot ini na naghahalo an mga layers kan tubig, kun sain mas halangkaw an ‘dissolve oxygen’ sa hibabaw na parte mantang mas hababa naman sa hirarom na parte, na igwang mga natitipon na nabubulok na mga materyal.
Dagdag pa kan opisyal na nangyayari ini enkaso igwang makukusog na duros o sunod-sunod an mga pag-uuran na posibleng maka-disturb sa hirarom na parte asin maghalo an mga nabubulok na mga materyal sa hibabaw na parte kan lawa.
Kun kaya posibleng maapektaran an mga fish cages asin maapektaran an mga sira sa katubigan.
Sa presente, padagos pa an pigsasagibong assessment kan ahensya mapadapit sa insidente.
