LEGAZPI CITY—Padagos na pig-aaram kan mga otoridad an motibo sa nangyaring pambabadil sa laog kan sarong eskwelahan sa Thailand.
Magigiromdomang nag-abot na sa siyam an binawian nin buhay asin 15 ang nairido makalihis na pagbabadilon kan sarong 14-anyos na estudyante gamit an 9mm na badil na pagrugaring kan saiyang lolo.
Kabale sa mga binawian nin buhay an tulong paratukdo, tulong estudyante, lolo asin lola kan suspek, magin an suspek na binadil suboot an sadiri sa huri.
Segun ki Toto Bering Cadapan an Bombo International News Correspondent Thailand, sa intrevista kan Bombo Radyo Legazpi, na basado sa report kan mga otoridad na binadil asin ginadan suboot kan suspek an saiyang lolo asin lola antes na magpasiring sa eskwelahan.
Nagpapadagos an imbestigasyon kan mga otoridad asin sa presente nagpaabot na nin tabang an gobierno para sa mga pamilya asin biktima kan pambabadil.
Dugang pa ni Cadapan na warang Pilipino an nadamay sa nasabing insidente.
