LEGAZPI CITY—Kahagadan ngunyan an P1 na dugang sa pamasahe kan mga jeepney driver sa Bicol kasunod kan nanutarang liwat na paglangkaw kan presyo nin petrolyo sa mga nakalihis na semana.
Segun ki Condor-Piston Bicol President Ramon Rescovilla, sa intrevista kan Bombo Radyo Legazpi, ini an nganing dae mawara sa tinampo an mga driver na nagpapasada asin maipadagos an saindang serbisyo sa mga commuter.
Makakadugang an nasabing dagdag-pasahe sa saindang ganansya asin makakatabang na makabakal maski papano kan mga pangenot na barakalon siring kan bagas.
Pagdoon pa kaini na mantang may P10 na fuel discount, sinabi ni Rescovilla na bako ini bastante para sainda.
Dugang niya na haros P15 an nawawara sa saindang ganansya huli kan padagos na paglangkaw kan presyo nin petrolyo.
Mientrastanto, katakod kan gigibohong State of the Nation Address ni Presidente Bongbong Marcos sa Lunes, Hulyo 27, makundusir man an grupo nin pagprotesta sa banwaan kan Daraga asin sa ciudad kan Legazpi, kun sain saro sa saindang pangapudan an magkaigwa nin panghaluyan na solusyon sa mas naglalalang krisis sa produktong petrolyo.
