Preparado si Department of Public Works and Highways (DPWH) Secretary Vince Dizon na makipagtabangan sa National Bureau of Investigation (NBI) katakod kan imbestigasyon sa suboot iregularidad sa 2019 Southeast Asian Games.
Ipigduon kan opisyal na malinig an saiyang konsensya kaya masunod siya enkasong magpaluwas nin subpoena an NBI bilang parte kan imbestigasyon.
Sinabi man ni Sec. Dizon na naibasura na an reklamong ipigsunad kontra saiya asin sa iba pang mga opisyal kan Disyembre 2021 kaya kampante siya na malinig an saiyang konsensya asin nagtutubod na matanos an pagkakagibo kan mga pasilidad.
Marurumduman na si Dizon an nagserbing chairman kan Bases Conversion and Development Authority, na namayo sa konstruksiyon kan sports facilities sa New Clark City.
Liwat na nabuhay an kontrobersiya sa 2019 SEA Games makalihis ihayag ni NBI Director Melvin Matibag na iimbestigaran ninda an suboot anomalya sa konstruksyon kan sports facilities.
