LEGAZPI CITY-Tinugutan kan Regional Trial Court (RTC) Branch 27 kan Lapu-Lapu City, Cebu an kontrobersyal na contractor na si Sarah Discaya na makapagpiyansa nin P1 million katakod kan kasong malversation of public funds asin pagbayolar sa Anti-Graft and Corrupt Practices Act na may kinaaram sa suboot ghost project sa Davao Occidental.
Tinugutan man kan korte an finance officer kan Department of Public Works and Highways (DPWH) sa Davao Occidental na si Czar Ryan Ubungen na makapagpiyansa nin P300,000.
Segun kay Judge Nelson Leyco kan RTC Branch 27, bako pa bastante an mga ebidensyang inihampang kan prosekusyon ngani magtenir an duwa sa kulungan mantang nagpapadagos an paglilitis.
Sinabi kan korte na wara pang testigong nakapagpatunay sa nagin papel ni Discaya sa suboot anomalya sa proyekto.
Dai man suboot napatunayan sa ngonian na siya an naggibo nin mga pekeng dokumento o nakipagsabwatan sa iba pang akusado.
Mientras tanto, dai man tinugutan kan korte an kahagadan na makapag-piyansa kan walong iba pang akusado, kaiba an nagkapirang opisyal kan DPWH asin sarong opisyal kan St. Timothy Construction.
Segun sa korte, mas makusog an mga ebidensya laban sa sainda, orog na sa mga pineke suboot na dokumento na sinda mismo an nagpirma.
Nilinaw man kan korte na an pagtatao nin piyansa, dai ibig sabihon na warang paninimbagan an akusado. Alagad, ini pagbisto sa direchos kan sarong akusado na makalaya pansamantala mantang nagpapadagos an pagdangog sa kaso.
Marurumduman na si Sarah Discaya, nahahampang sa hiwalay na kasong may kinaraaman sa suboot P53.9 million ghost project sa Calumpit, Bulacan.
