LEGAZPI CITY-Ipighayag kan sarong Psychology Professor na dai sana mababasol an violent behavior kan mga jovenes sa social media o mga online game alagad tinawan doon na an family environment, mental health, school experiences, asin mga impluwensya sa online an nakakadagdag sa pinag-oolayang peligro kaini.
Segun kay Ateneo de Manila University Psychology Professor Dr. Liane Alampay, kadakol na kawsa asin sistematikong rason kun nata nagigin bayolente an sarong aki.
Paliwanag niya na an online games o social media, saro sa mga rason alagad igwa pang dagdag na risk factors na nagbubusol sa mga kajovenesan na gumibo nin kadahasan.
Tinawan doon pa kaini na bako gabos na naggagamit nin online games asin social media, iyo an nagigin bayolente, alagad igwang mga aki na “at risk” huli sa dagdag na mga risk factors sa saindang personalidad, pag-iisip, pamilya, eskwelahan asin sa saindang relasyon sa kapwa estudyante, komunidad, asin sa online.
Ini an kombinasyon suboot kan mga risk factors kun kaya nagigin bayolente an sarong joven.
Pighalimbawa ni Dr. Alampay an mga pag-aadal mapadapit sa mga salik na ini kun sain naglalangkaw an posibilidad na magin bayolente kun sinda igwang mental health problems, arog kan depression, anxiety, social isolation, conduct disorders, o agressive tendencies.
Ini posibleng makadagdag sa mga salik orog na kun bayolente an family level para sa sarong aki.
Kadakol man suboot na pag-aadal sa kinaban na nagpapahiling na an madahas na parenteng sa mga kaakian, mas nagigin epekto kaini sa aki an agresyon asin pagigin bayolente.
