Nangapudan si Metropolitan Manila Development Authority (MMDA) General Manager Nicolas Torre III sa mga raliyista na ikonsidera asin inuton an kapakanan kan publiko, sa tahaw kan mahewasan na pagtiripon sa EDSA.
Nagsagibo kaya ngunyan na aldaw an mga miyembro kan Iglesia ni Cristo nin rally na inatendiran kan rinibong mga miyembro, bilang pagpapahiling nin suporta ki Senador Rodante Marcoleta katakod kan plano kan Ombudsman na magsunad nin kaso kontra saiya.
Segun ki GM Torre III, dapat mangibabaw an common good urog pang direktang naaapektaran an trapiko asin operasyon kan mga negosyo huli sa biglaan na pagtiripon.
Sinabi kan opisyal na tulos na nag-deploy an MMDA nin dugang na traffic enforcers, kaibanan an mga pulis, makalihis an gubot na trapiko sa kalabaan kan EDSA.
Uminabot na hasta sa Makati City an trapiko sa northbound lane kan EDSA, mantang sa southbound man an uminabot na hasta sa Timog Avenue, Quezon City.
Liwat man na nangapudan an dating Philippine National Police (PNP) chief sa mga raliyista na maging mahinahon sa pagpapahayag kan saindang saloobin asin sa mga gigibuhon na aksyon.
