Posibleng maging pinakahalawig na impeachment trial sa historya kan nacion an paglilitis ki Vice President Sara Duterte, segun ki Senate Secretary Renato Bantug.
Basado sa pagkakarkulo kan impeachment clerk of court, posibleng umabot sa pitong bulan an trial, huli ta tulong aldaw kada semana an target na schedule sa paglilitis.
An pitong-buwang projection, segun ki Bantug an nakabase sa 92 trial days na pighahagad kan House Prosecution Panel asin 30 aldaw na pighahagad kan Defense Panel ngani na maipresentar kan duwang lado an saindang mga ebidensya asin testigo.
Siring man, posible na mapahalipot an proseso kun mas dakol na mga testigo an maipi presenta kada aldaw.
Kung ikukumparar sa nakalihis na mga impeachment trial, uminabot sana sa 44 aldaw an paglilitis ki dating Chief Justice Renato Corona kan 2012.
Mientras tanto, an trial man kontra ki dating Presidente Joseph Estrada kan 2001 an nagdurar sana nin 23 na aldaw, makalihis mag-walkout an House Prosecution Panel huli ta nagsayuma kaito an Senate Impeachment Court na buksan ang tinaguriang “second envelope.”
Segun ki Atty. Bantug, saro sa mga pangenot na pinaghahandaan kan impeachment court an halawig na trial, mantang kaipuhan man na balansehon an trabaho bilang lehislatura, siring kan paggibo nin ley, pagbusisi sa mga propuestong ley, asin pagt-aadal sa propuestong pondo para sa masunod na taon, asib iba pa.
