LEGAZPI CITY-Itinakda na kan International Criminal Court (ICC) an pormal na iskedyul para sa ikaduwang status conference sa kasong kinahahampang ni dating Presidente Rodrigo Duterte katakod kan suboot crimes against humanity huli sa saiyang madugong ‘war on drugs.’
Sa ipiniluwas na public order kan ICC kan Huwebes, nakalaag digdi na gaganapon an status conference sa Hunyo 23, 2026, poon alas-10:00 nin aga hasta alas-12:00 nin pagka-udto (lokal na oras).
Segun sa Trial Chamber III kan ICC, limang pangemot na isyu an pokus kan talakayan sa nasabing pagdangog, kaiba na an mga minasunod:
-Deadline kan pagsusumite kan obserbasyon sa Expert Panel Report
-Pag-adaptar kan protocol sa pagkapot kan confidential information
-Limitasyon sa lawig kan Prosecution Trial Brief
-Pagtatakda kan masusunod na status conferences makalihis an judicial recess
-Public statements kan mga counsel
Naenot nang isinagibo an enot na status conference kan Mayo 27, 2026, kun saen napag-desisyon kan hukuman na kaipuhan an ikaduwang sesyon para sa mas detalyadong pagtalakay sa proseso kan kaso.
Bilang paghahanda, hinagad kan korte kan Hunyo 12 na magsangat kan mga mungkahi na dapat pag-olayan.
Susog sa record, nagsumiter sana nin rekomendasyon an prosekusyon kan Hunyo 17, mantang an depensa asin Registry, iyo an nagsabi na wara sindang ipigsasangat na dagdag na item.
Mantang pampubliko an status conference, nilinaw kan ICC na psobleng magdagos nin private session kun kaipuhan, orog na ngani maibitaran an pagluwas kan sensitibong impormasyon katakod kan witness protection asin seguridad.
Kinumpirma man kan korte na dai maatendir si Duterte sa nasabing pagdangog matapos niyang i-waive an saiyang direchos na makapag-atendir.
