Nagkasundo na an Estados Unidos asin Iran na tapuson na an saindang giyera, segun sa pahayag ni Pakistani Prime Minister Shehbaz Sharif ngunyan na Lunes.
Segun ki Sharif, magkakaigwa nin opisyal na signing ceremony sa Switzerland sa Biyernes para sa nasabing kasunduan.
Kinumpirmar man ini ni US President Donald Trump sa saiyang social media, kun sain sinabi niyang kumpleto na an kasunduan sa Islamic Republic of Iran.
Nabilog an kasunduan sa ibong kan airstrike kan Israel sa Lebanon kan Domingo, na nakaresibe nin matinding pagtuyaw hali sa Iran asin maging ki Trump.
Dae pa ipigpapaluwas sa ngunyan an kumpletong detalye kan kasunduan, alagad segun ki Sharif, kaibanan digdi an tulos na implementasyon asin permanenteng pagpundo kan gabos na operasyong militar, kaibanan an sa Lebanon.
Basado pa sa mga report na pinaglalaoman na liwat na bubuksan an Strait of Hormuz, tatapuson an blockade kan Estados Unidos sa mga pantalan kan Iran asin papalawigon an ceasefire mantang ipagpapadagos an pag-oolay dapit sa nuclear program kan Iran sa laog nin 60 aldaw.
Segun man ki Trump, magiging bukas an Strait of Hormuz nin warang bayad asin matatapos na man an naval blockade kan Amerika.
