LEGAZPI CITY—Nangapudan an grupong Alliance of Concerned Transport Organization sa gobierno na parikason na an pagbayad sa mga drayber na nagin benepisyaryo kan service contracting program.
Segun ki Alliance of Concerned Transport Organization National President Liberty De Luna, sa intrevista kan Bombo Radyo Legazpi, naghahalat sa ngunyan an mga drayber kan saindang payment huli sa laog kan duwang semanang libreng sakay an sinda an nag-aabonar kan pambakal sa gasolina asin boundary o hulog sa pagpasada.
Nagmamawot man an grupo na may kasunod pa ini sagkod na dae pa natatapis an krisis sa nacion.
Dugang niya dapat tanggalon na an oil deregulation asin iba pang buwis sa krudo huli sa ini an mas lalo pang nagpapatios sa mga drayber.
Afuera digdi nangangapudan man an grupo na madugangang pa an saindang ayuda magin an service contracting huli sa dakula ining tabang para sa mga operator asin drayber kan mga pampublikong transportasyon.
