LEGAZPI CITY- Ginatos na mga butanding na an namamatawan sa banwaan kan Donsol, Sorsogon na patok sa mga turista ngunyan.
Segun ki Sorsogon Tourism Officer Bobby Gigantone sa intrevista kan Bombo Radyo Legazpi na maugma sinda na sa pagultangan kan peak season puon Marso, dagos an dakol na sightings kan butanding sa lugar.
Napag-araman na dakol na mga local asin foreign tourists an nagpapasyar sa lugar para sa kamawotan na personal na masaksihan an pagpapahiling kan mga butanding.
Basado sa datos, nasa poco mas o menos 97 an butanding sightings sa nakalihis na semana sana.
Kun susumahon puon kan Marso, ginatos na suboot an nahiling na mga butanding sa nasabing banwaan.
Napag-araman na nagkakaigwa nin tagging sa mga butanding kaya naaaydentipikaran an mga nagpapahiling na mga butanding.
Segun ki Gigantone na dakula an impact kaini sa turismo kan provincia, urog pa na an tourism an pigkokunsiderar na ‘global economic driver’ na nagki-krear nin trabaho asin iba pang mga oportunidad.
