LEGAZPI CITY-Ipinahayag kan Kontra Daya an saindang kumpiyansa sa isinangat na complaint sa Commission on Elections (Comelec) complaint laban kina Vice President Sara Duterte asin President Ferdinand Marcos Jr. huli sa pagresibe suboot nin donasyon kan 2022 Elections.
Segun ki Kontra Daya Convenor Professor Danilo Arao, sa intrevista kan Bombo Radyo Legazpi na may kinaaraman ini sa campaign contributions na nagbabayolar sa Article 95 (c) kan Omnibus Election Code kun sain nakalaag digdi na dai pwedeng magin campaign contributor an government contractor.
Dagdag pa ni Arao na basado sa saindang pagbusisi, igwang tig-sarong contributor si Duterte asin Marcos na mga government contractor.
Pinangaranan ninda ini na si “Hilot” para sa kaso ni Marcos kun sain nagtao suboot nin nasa P20 Milyon bilang donasyon, mantang si “Escandor” naman para sa kaso ni Duterte, kun sain nagtao suboot nin nasa P19.9 Milyon bilang donasyon.
Nahaluyan man suboot sinda sa pagsangat kaini huli ta kadakol na panahon an ginugol ninda digdi asin nakagastos nin humigit kumulang P33, 000 ngani makuwa sana an mga dokumento bilang dagdag ebidensya sa reklamo.
Nagtutubod man si Arao na an saindang argumento basado sa katotohanan asin pananaliksik kun kaya halangkaw an saindang kumpiyansa na dadangugon ini kan Comelec.
